قضيتك قيمتك

المرة دى حبيت أتكلم عن موضوع جديد شوية

حابب أتكلم عن قيمة الأشخاص هل هى مرتبطة بالفلوس أو الجمال أو الذكاء !!

انهارده و أنا مع والدى فى العربية كان مشغل شريط بيتكلم عن قيمة الأشخاص و باختصار كان بيكلم كل فرد لو انت فاكر ان قيمتك بفلوسك ف فى أغنى منك أو بجمالك ف فى أجمل منك أو بذكاءك ف فى أذكى منك ..

طب قيمتك ف ايه ؟!!!

قيمتك ف انك تكافح لحد ما توصل لحلمك مش مجرد كفاح حتى .. لأ كمان لازم تحقيق للحلم

 أكيد فى مطبات فى الطريق للحلم و اللا كان كل الناس حققت أحلامها و أكيد بردو هنلاقى ناس مش مهتمة بأحلامنا أو قضايانا و ده عادى عشان كل واحد له حلم مختلف و قضية مختلفة عن غيره و طبعاً السبب بيئة مختلفة و زمن مختلف نشأ فيهم .. دايماً والدى كان يقول لنا زمان لما كنا نشتكى من صعوبة تمارين السباحة :

"NO Pain , No Gain" 

و دايماً لما بحس باليأس بقول جوه نفسى : "الأحلام الكبيرة محتاجة مجهودات كبيرة"  

أسوأ حاجة لو مش هنحقق أحلامنا و قضايانا إننا هنروح زى ما جينا من غير قيمة من غير ما نغير ف اللى مش عاجيبنا حوالينا و ساعتها مش هينفعنا كلام الناس اللى أحبطونا و على فكرة الناس دول نفسهم بيكونوا من ضمن اللى بيفخروا بينا بس بعد تحقيق أحلامنا .. الجميل بقى رغم كل الصعوبات بس بعد تحقيق الإنسان لأحلامه بيروح و بيتنسى كل التعب ده "كأنه لم يكن" .. أعتقد قيمتك حاجة تستحق الإصرار عشانها :)

عبدالرحمن القاضى