حب !! هو قال لك فين ؟!

من الحاجات المهمة اللى كل واحد بيعيش يدور عليها هى الحب .. لكن هو موجود أصلاً ؟

من فترة واحد صاحبى أثَّر فىَّ كلامه لما قال لى الحب موجود بس فى العلاقة بين العبد و ربه بس و لما سألته اشمعنى ؟ قال لى عشان احنا مهما نعصى ربنا ساترنا بذنوبنا و عيوبنا. وقت ما بنتقرب لربنا بالطاعة بعد كل ده بيقبلنا و يرشدنا للطريق الصحيح كأننا لم نعصاه..

طب و العلاقة بين الرجل و الست ؟؟ ربنا عز و جل وصفها بالمودة و الرحمة و السكينة بس لأنها بالمقارنة بمفهوم الحب الحقيقى (ولا حاجة)
عارف ليه ؟ عشان مهما يكون اللى بيدعى حبك أو بتدعى حبه مع كتر العصيان لكلام الطرف التانى الشعور هيقل بينكوا واحدة واحدة لحد ما تبقى علاقة جافة و لو عُرض السماح بعد كل ده .. مرة فى التانية فى التالتة مش هتقبلوا !

بس اشمعنى المودة و الرحمة و السكينة ؟؟ لو فكرت فى كل حاجة حلوة نِفسك اللى حواليك يعملوها لك هتلاقيها قائمة على الرحمة و الاحسان و عشان كده ده كان أدق وصف للعلاقة السوية بين الرجل و الست.

و فى رأيى إن الأفلام و المسلسلات اللى بتهدف انها توصل مفهوم الحب بين الراجل و الست كأنه وردى هو السبب فى انفصال و طلاق كتير من الأزواج عشان كل طرف عايز أحسن حاجة لنفسه و واصل له من الاعلام ان فى شخص هيحبه بدون شروط و كل الكلام اللى بنسمعه ..
بس بمجرد انه ينزل لأرض الواقع يتصدم و يفكر أنا مش عايز الشخص ده مش هو ده الحب اللى أعرفه و مهما يدور مش هيلاقى الحب اللى يعرفه غير فى علاقته مع ربنا :)

ديه آيات تدل على كلامى :
-"وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِقَوْمٍ يَتَفَكَّرُونَ" صدق الله العظيم
-"يُحِبُّهُمْ وَيُحِبُّونَهُ" صدق الله العظيم

-"قُلْ إِنْ كُنْتُمْ تُحِبُّونَ اللهَ فَاتَّبِعُونِي يُحْبِبْكُمُ اللهُ وَيَغْفِرْ لَكُمْ ذُنُوبَكُمْ وَاللهُ غَفُورٌ رَحِيمٌ" صدق الله العظيم

فكرة :أسامة مجدى
كتابة :عبدالرحمن القاضى